Бәйтерек ауданында өткен референдум ерекше оқиғамен есте қалды: жергілікті компанияның қызметкерлері дауыс беруге 12 бірдей арнайы техникамен сап түзеп келген, деп хабарлайды Zhaiyqmedia ақпарат агенттігі.
№206 референдум учаскесіне «Everest Logistics Company» компаниясының ұжымы толық құрамда келіп, ел болашағы үшін өз таңдауын жасады. Ауыр техника тізбегін көрген жұртшылық еңбек адамдарының бұл әрекетіне оң бағасын беріп, олардың азаматтық ұстанымына тәнті болды.
«Жұмыс кестеміз тығыз болса да, еліміз үшін маңызды тарихи сәттен тыс қала алмадық. Бұл – әрқайсымыздың азаматтық борышымыз. Сондықтан ұжым болып келіп, өз таңдауымызды жасауды жөн көрдік», – деді компания қызметкерлері.
Бұл оқиға – жұмысшылардың ел тағдырына бей-жай қарамайтынын және бірлік пен жауапкершіліктің айқын үлгісін көрсетті. Компания өкілдері мұндай маңызды саяси науқанға қатысу әрбір қазақстандықтың міндеті екенін атап өтті.
Фото: Әлеуметтік желіден
