Сурет: Egemen Qazaqstan
Ел тұрғындарына дәрігердің қабылдауына жазылуға қатысты алаяқтықтың жаңа тәсілі туралы ескерту жасалды, деп хабарлайды Zhaiyqmedia.kz ақпарат агенттігі.
Қаскөйлер азаматтарға телефон шалып, өздерін емхана немесе медициналық орталық қызметкері ретінде таныстырады. Олар қабылдауға жазылуға немесе кезекке тұруға көмектесетінін айтып, сенімге кіруге тырысады.
Жазылуды «растау» үшін алаяқтар SMS арқылы келген кодты айтып беруді сұрайды. Абай облысының полициясы мұндай кодтар жеке кабинеттерге, банк сервистеріне және азаматтардың жеке мәліметтеріне қол жеткізуге мүмкіндік беруі мүмкін екенін ескертті.
Құқық қорғау органдарының мәліметінше, мемлекеттік мекемелер мен медициналық ұйымдардың қызметкерлері ешқашан құпия кодтарды сұрамайды. Сондықтан осындай қоңырау түскен жағдайда әңгімені бірден тоқтату ұсынылады.
