Құрылтайшыларының бірі Динара Құлыбаева болып табылатын «Нұрсұлтан Назарбаевтың білім беру қоры» (NNEF) Қазақстан-Британ техникалық университетінің (ҚБТУ) акционері атанды. Бұған дейін оқу орны «Қайтарылған активтерді басқару жөніндегі компанияның» иелігінде болған, деп хабарлайды Zhaiyqmedia ақпарат агенттігі.
Акционердің ауысқаны туралы мәлімет Қаржылық есептілік депозитарийінің ресми сайтында жарияланды. Осылайша, бұрын өзіне тиесілі болған актив Назарбаев қорының бақылауына қайта өтті.
Сонымен қатар корпоративтік оқиғалар туралы басқа есепте ҚБТУ-дың Алматыдағы бас ғимаратын мемлекет меншігіне беру туралы шешім қабылданғаны көрсетілген.
«ҚБТУ» АҚ-ның 1957 жылы салынған, Алматы қаласы, Төле би көшесі, 59-мекенжайында орналасқан және республикалық маңызы бар тарих пен мәдениет ескерткіші болып табылатын әкімшілік ғимараты сыйға тарту шартын жасасу және қабылдау-тапсыру актісіне қол қою арқылы мемлекетке берілсін. Жоғарыда аталған ғимаратқа сенімгерлік басқару шартын жасасуға бастамашылық етілсін», – делінген акционердің жарияланған шешімінде.
Фото: Әлеуметтік желіден
