Ақтау қаласындағы ветеринарлар қанаты сынып, ауыр халде жатқан аққудың өмірін сақтап қалды, деп хабарлайды Zhaiyqmedia ақпарат агенттігі.
Дәрігерлердің айтуынша, емханаға жеткізілген кезде аққудың жағдайы өте ауыр болған. Оның сол қанатының сүйегі ашық сынып, екі тәуліктен астам уақыт бойы қан тоқтамаған.
«Құс екі тәуліктен астам қансыраған. Әр сағат маңызды болды. Біз қысқа мерзімде оның жағдайын тұрақтандырып, отаға дайындықты бастадық. Бұл – ересек, жабайы құс. Ол өте күшті, агрессивті және қатты күйзелісте болды. Мұндай жануарлармен жұмыс істеу әрқашан үлкен тәуекелді талап етеді», – дейді дәрігерлер.
Мамандардың сөзінше, газбен наркоз беретін құрылғының болмауы істі айтарлықтай қиындатқан. Сондықтан олар өз тәжірибесі мен шетелдік орнитологтардың кеңестеріне сүйеніп, барлық жауапкершілікті өз мойнына алған.
Ота сәтті өтіп, сынған жерге сыртқы фиксатор салынды. Алайда жараны толық жабу үшін жұмсақ тіндердің жетіспеушілігі секілді қиындықтар туындаған. Ендігі басты міндет – аққуды тыныш әрі құрғақ жерде ұстап, тігістерін үнемі өңдеп, күйзеліске түсірмеу.
Емхана өкілдері бұл көмекті өз бастамаларымен көрсеткенін және барлық шығынды мекеме өз мойнына алғанын мәлімдеді.
Фото: Әлеуметтік желіден
