Сурет: Ұлттық қауіпсіздік комитеті
Қазақстанға апиын тасымалдамақ болған шетелдік ұсталды. Ол денесіне 1 келі есірткі жасырған. Бұл – есірткі жеткізудің халықаралық арналарын жою барысында анықталған кезекті оқиға, деп хабарлайды Zhaiyqmedia.kz ақпарат агенттігі.
Биыл сәуір айынан бері есірткі жеткізудің 9 халықаралық және 2 өңірлік арнасы жойылды. Сондай-ақ бір фитозертхананың жұмысы тоқтатылды. Бұл туралы ҚР Ішкі істер министрлігінің есірткі қылмысына қарсы іс-қимыл департаментінің бастығы Дархан Кәрібаев мәлімдеді.
«Ұсталған шетелдік азамат денесіне арнайы жасырын қалта тігіп, 1 келі апиын тасымалдаған. Ол Қазақстан арқылы көршілес елдерге есірткі жеткізуді жоспарлаған», – деді Кәрібаев.
Қазіргі таңда күдіктіге қатысты тергеу амалдары жүргізіліп жатыр. Есірткінің шығу тегі мен тапсырыс берушілер анықталуда.
