Оманның Сыртқы істер министрі Бадр Әлбусайди АҚШ-тың Иранмен арадағы қақтығысы ушығып бара жатқанын айтып, Вашингтонның одақтастарын бұл қауіптің алдын алуға шақырды, деп хабарлайды Zhaiyqmedia ақпарат агенттігі.
The Economist басылымына сұхбат берген министр соңғы үш апта бойы АҚШ пен Иран арасындағы шиеленісті бәсеңдету үшін негізгі делдал болып жүр. Оның пікірінше, бұл соғыстың зардабы бүкіл аймаққа тиеді.
«АҚШ-ты одақтастары өзіне қажетсіз соғыстан қалай да алып шығуы керек», – деді Бадр Әлбусайди.
Министрдің айтуынша, соңғы 9 айда АҚШ пен Иран Иранның ядролық бағдарламасына қатысты күдікке байланысты екі рет ашық соғыс шегіне жеткен. Ол 28 ақпанда Израиль мен АҚШ-тың жасаған соққысы Иран үшін күтпеген жағдай болмағанын, Тегеран оған алдын ала дайындалғанын атап өтті.
Әлбусайди қазіргі жағдай Иранның мүддесіне жұмыс істеп жатқанын жеткізді. Оның сөзінше, Иранның аймақтағы америкалық нысандарға жасаған жауап соққылары Парсы шығанағы елдерінің қауіпсіздігіне тікелей қауіп төндірген. Салдарынан аймақтың туризм, авиация және технология салалары елеулі дағдарысқа ұшырады. Сонымен қатар Ормуз бұғазындағы тұрақсыздық мұнай бағасының күрт өсуіне әкелді.
Дипломат бұл соғыс АҚШ үшін өте қымбатқа түсіп жатқанын, сондықтан Вашингтонның өзі қақтығысты тезірек тоқтатуға мүдделі болуы керегін ескертті. Әйтпесе, АҚШ ішінде соғысқа қарсылық күшейіп, жағдай одан әрі күрделене түспек.
«Бұл соғыста жеңімпаз жоқ. Жалғыз шешім – дипломатия», – деп қорытындылады сөзін министр.
Айта кетейік, кеше Мәскеу Тегеранды Наурыз мерекесімен құттықтап, «Біз сіздермен біргеміз» деп ресми түрде қолдау білдірді.
Фото: Әлеуметтік желіден
