Қазақстан мен Түркия арасындағы білім саласындағы ынтымақтастық жаңа деңгейге көтерілді. Енді еліміздің азаматтары Түркияның үздік оқу орындарында тегін білім ала алады, деп хабарлайды Zhaiyqmedia.kz ақпарат агенттігі.
Ғылым және жоғары білім министрі Саясат Нұрбектің айтуынша, «Абай – Акиф Ерсой» стипендиялық бағдарламасы екіжақты келісім аясында іске қосылады. Бағдарлама қазақстандық студенттерге Түркияның жетекші университеттерінде тегін оқуға мүмкіндік береді.
«Бұл – білім саласындағы тарихи келісім. Біздің жастар енді Түркияның ең үздік оқу орындарында сапалы білім алып, тәжірибе жинақтай алады», – деді министр.
Стипендия барлық мамандықтар бойынша беріледі. Үміткерлерге қойылатын талаптар мен құжаттар тізімі жақын арада Ғылым және жоғары білім министрлігінің сайтында жарияланады.
