Оралда өткен «Жайық жүйрігі – 2025» бәйгесінде бас жүлде – пәтер иесін тапты,-деп хабарлайды Жайықмедиа.кз.
Орал қаласында қала күні мерекесіне орай дәстүрлі «Жайық жүйрігі – 2025» ұлттық ат спорты чемпионаты ұйымдастырылды. Жарысқа Қазақстанның барлық өңірінен бөлек, Ресейдің Орынбор, Татарстан, Челябинск және Башқұртстан аймақтарынан келген 100-ге жуық шабандоз қатысты.
Бәйге Ұлы аламан, Топ бәйге, Құнан бәйге және Ұшқыр бәйге түрлері бойынша өтті. Ашылу салтанатында Батыс Қазақстан облысының әкімі Нариман Төреғалиев Мемлекет басшысы Қасым-Жомарт Тоқаевтың ұлттық спортты дамытуға қатысты тапсырмаларын атап өтіп:
«Бұл сайыс – дені сау қоғам қалыптастыру және ұлт өміршеңдігін нығайтуға бағытталған ұлттық спортты өркендету жолындағы маңызды қадам», – деді.
Жалпы жүлде қоры 45,5 миллион теңгені құраған додада ең ірі сыйлықтар – пәтер мен автокөлік болды.
Жеңімпаздар тізімі:
- 1400 м (Ұшқыр бәйге) – Күрішбек Дидарбек (Орал), жүлде – 2 млн теңге;
- 2000 м (Ұшқыр бәйге) – Күрішбек Дидарбек, аты – Нұр-Шатоя, жүлде – 3 млн теңге;
- 11 км (Құнан бәйге) – Жанболат Марден (Алматы облысы), аты – Шамшырақ, жүлде – 2 млн теңге;
- 16 км (Топ бәйге) – Исламнұр Ертөс (Алматы қаласы), аты – Тобылғы торы, жүлде – автокөлік;
- 31 км (Ұлы аламан бәйге) – Жанболат Марден (Қарағанды облысы), бас жүлде – пәтер.
Оралдағы ұлттық ат спорты додасы биыл да қызықты тартыстарымен есте қалып, атбегілердің мерейін үстем етті.
