Сурет: istockphoto.com
Астаналық тұрғын Қорғаныс министрлігіне қарсы сотта жеңіп шықты. Ол министрліктің қызметтік тұрғын үйді жалдау шартын ұзартудан бас тартуына байланысты сотқа жүгінген, деп хабарлайды Zhaiyqmedia.kz ақпарат агенттігі.
Мамандандырылған ауданаралық әкімшілік соттың мәліметінше, талапкерге 2009 жылы қызметтік пәтер берілген. 2025 жылы ол жалдау шартын ұзартуға өтініш білдірген. Алайда кәмелетке толған қызының атында тұрғын үй рәсімделгеніне байланысты өтініші қабылданбаған.
Сот кәмелет жасына жетіп, бөлек тұратын балалардың жеке мүлкі қызметтік баспана беру шартының өзгеруіне себеп бола алмайтынын мәлімдеді.
«Сот талапкердің кәмелетке толған балалары бөлек тұрып, дербес шаруашылық жүргізетінін анықтады. Сонымен қатар бөлек тұратын кәмелетке толған отбасы мүшесінің меншігінде тұрғын үй болуы қызметтік тұрғын үйді жалдау шартын ұзартудан бас тартуға автоматты түрде негіз бола алмайды», делінген хабарламада.
Осылайша сот бас тартуды заңсыз деп танып, жауапты органға істі қайта қарауды міндеттеді.
