Сурет: Ақорда
Президент Қасым-Жомарт Тоқаев Алатау қаласын дамыту жөніндегі кеңесте инвестициялық жобалар мен экологиялық қауіпсіздік мәселелерін көтерді. Ол табиғатқа зиян келтіретін компанияларды қатаң бақылауға алуды тапсырды, деп хабарлайды Zhaiyqmedia.kz ақпарат агенттігі.
Мемлекет басшысы жерді қалпына келтіру және экологиялық талаптарды сақтау мәселесіне ерекше назар аударды. Ол инвестициялық жобаларды іске асыру кезінде табиғатқа жанама әсерді азайту қажеттігін айтты.
«Экологияны бұзатын компанияларға ешқандай жеңілдік болмайды. Біз табиғатты қорғау үшін барлық қажетті шараларды қабылдаймыз», — деді Тоқаев.
Президенттің тапсырмасы бойынша, экологиялық заңбұзушылықтарға жол берген кәсіпорындардың жұмысы тоқтатылып, оларға қатаң шаралар қолданылады. Бұл шешім Алатау қаласының тұрақты дамуына және аймақтың экологиялық ахуалын жақсартуға бағытталған.
