Олимпиада чемпионы Серік Сәпиев пен танымал кәсіпқой боксшы Қанат Ислам Қазақстан бокс федерациясында жауапты қызметтерге тағайындалды, деп хабарлайды Zhaiyqmedia ақпарат агенттігі.
Федерацияның баспасөз қызметінің мәліметінше, Серік Сәпиев Қазақстан бокс федерациясы (ҚБФ) президентінің боксты дамыту жөніндегі кеңесшісі лауазымына келді.
«Президент кеңесшісі ретінде Серік Сәпиев ұлттық құрамалардың нәтижесін жақсартумен, спортты жүйелі дамытумен және Олимпиада ойындарында жоғары жетістіктерге жету ісімен айналысады», – делінген ресми хабарламада.
Серік Сәпиев – Олимпиада чемпионы, әлемнің және Азияның екі дүркін чемпионы. Сонымен қатар ол боксшыларға берілетін ең беделді марапат – Вэл Баркер кубогының иегері. Бұған дейін спорт және мемлекеттік басқару саласында бірқатар басшылық қызмет атқарған.
Ал кәсіпқой боксшы Қанат Ислам 19 жасқа дейінгі боксшылардан құралған Қазақстан жастар құрамасының үйлестірушісі болып бекітілді.
«Қанат Ислам Қазақстанның жастар құрамасының жұмысын үйлестіріп, олардың әлемдік аренадағы нәтижелерін жақсартуға үлес қосады», – деп атап өтті федерация өкілдері.
Қанат Ислам – кәсіпқой рингте WBA Fedecaribe тұжырымы бойынша чемпион атанған боксшы. Әуесқой бокстағы мансабында Олимпиада ойындарының, әлем чемпионаттарының және Азия ойындарының жүлдегері болған.
Фото: gov.kz және Қанат Исламның Instagram парақшасынан
