Енді блогерлер жасырын саяси жарнама жүргізсе, заң алдында жауап береді. Бұл туралы Орталық сайлау комиссиясы мәлімдеді, деп хабарлайды Zhaiyqmedia.kz ақпарат агенттігі.
ОСК төрағасы Нұрлан Әбдіровтің айтуынша, егер блогер кандидатпен немесе партиямен ақылы келісімшарт жасасып, оны жасырса, бұл заң бұзушылық саналады.
«Қоғамдық пікірге әсер ету үшін арнайы ақы төленіп, жарнама жасалса, бірақ бұл туралы ешкім білмесе, онда блогер жауапқа тартылады», – деді ол.
Комиссия өкілдері бұл талаптың әлеуметтік желідегі белсенділерге де қатысты екенін атап өтті. Егер блогердің парақшасы арқылы жасырын үгіт жүргізілсе, ол да заң алдында жауап береді.
Бұл шара сайлау алдындағы үгіттің ашық әрі әділ өтуін қамтамасыз ету үшін қабылданып отыр. ОСК мамандары блогерлерді заң талаптарымен танысуға шақырды.
