Астанадағы жеке стоматологиялық клиникада 20 жастағы жігіт ем үстінде көз жұмды. Оқиға орнына жедел жеткен дәрігерлер жас жігіттің өмірін сақтап қала алмады.
Қазіргі уақытта бұл факті бойынша сотқа дейінгі тергеу басталды. Құқық қорғау органдары клиника қызметкерлерінен жауап алып, оқиғаның мән-жайын анықтап жатыр, деп хабарлайды Zhaiyqmedia.kz ақпарат агенттігі.
Марқұмның туыстары клиника әкімшілігінің әрекетіне күмән келтіріп, толық тексеру жүргізуді талап етуде. Сарапшылардың айтуынша, мұндай жағдайларда анестезияға аллергиялық реакция немесе медициналық қателік себеп болуы мүмкін.
«Балам тісін емдетуге барған еді, енді ол жоқ. Біз шындықты білгіміз келеді», — дейді қайғылы оқиғадан қабырғасы қайысқан әке.
Денсаулық сақтау басқармасы да оқиғаны бақылауға алды. Клиниканың лицензиясы мен қызметкерлердің біліктілігі тексеріледі. Нәтижесінде қылмыстық іс қозғалуы әбден мүмкін.
