Атырауда ТМ-2 жылу магистралінің реконструкциясы аяқталуға жақын қалды,-деп хабарлайды Zhaiyqmedia.kz.
Атырау қаласында ТМ-2 жылу магистралін қайта жаңарту жұмыстары қарқынды жүріп жатыр. Бұл желі шамамен 10 мыңға жуық тұрғынды және 7 әлеуметтік нысанды жылумен қамтамасыз етеді.
Қазіргі таңда 3,9 шақырымдық құбырдың 3 820 метрі толық ауыстырылып, қалған бөлігінде тұйықтау жұмыстары жүргізілуде. Жауаптылардың айтуынша, бұл жұмыстар жылу беру процесіне әсер етпейді және 12 қазанға дейін толық аяқталады.
Сонымен қатар, қала басшылығы Х.Доспанова көшесіндегі 58а үйдің тұрғындарымен кездесті. 1985 жылы салынған бұл көпқабатты үй жуырда апатты деп танылған. Енді тұрғындарға үй кезегіне тұру мүмкіндігі беріледі.
Әкімдіктің мәліметінше, басқару нысанының болмауы мен тұрғындардың белсенділігінің төмендігі салдарынан үйдің жертөлесі мен ортақ мүліктері күтімсіз қалған. Мұндай жағдайдағы үйлер қалада бірнешеу бар.
Әкімдік тарапынан жылумен қамту бойынша барлық қажетті шаралар қабылданбақ. Дегенмен, үйді күтіп-ұстау мен санитарлық тәртіпті сақтау тұрғындардың да ортақ жауапкершілігі екені атап өтілді.
