Қазақстанда газ бен сұйытылған мұнай газының көтерме бағасын қайта көтеру жоспарланып отыр. Бұл шара газ өндірісін арттырып, салаға инвестор тарту үшін қажет, деп хабарлайды Zhaiyqmedia.kz ақпарат агенттігі.
Премьер-министрдің орынбасары Серік Жұманғариннің айтуынша, қазіргі баға – нарықтық емес. Ол өндірушілердің шығынын жаппайды, сондықтан жаңа инвестициялар келмейді. «Газ өндіру тиімсіз болса, онда оны ешкім шығармайды. Ал бізге өндірісті ұлғайту керек», – деді вице-премьер.
«Біз көтерме бағаны біртіндеп нарықтық деңгейге жеткізуіміз керек. Әйтпесе, газ тапшылығы туындауы мүмкін», – деп ескертті Жұманғарин.
Бұл – биылғы жылы газ бағасын көтеру жөніндегі екінші мәлімдеме. Бұған дейін де Үкімет бағаны реттеуді азайтуды ұсынған болатын. Алайда дәл қанша пайызға өсетіні әзірге белгісіз.
