Сурет: Ақорда
Мемлекет басшысы Қасым-Жомарт Тоқаев Ішкі істер министрі Ержан Сәденовті қабылдап, елдегі криминогендік жағдай мен ведомство алдындағы міндеттердің орындалуы жөнінде баяндама тыңдады, деп хабарлайды Zhaiyqmedia.kz ақпарат агенттігі.
Министрдің айтуынша, 2026 жылдың алғашқы бес айында тіркелген қылмыс саны өткен жылдың осы кезеңімен салыстырғанда 9 пайызға азайған. Негізгі санаттар бойынша құқықбұзушылықтың төмендеуі және қылмысты ашу деңгейінің артқаны байқалады.
Алдын алу шаралары мен қоғамдық қауіпсіздікті сақтау мәселесіне ерекше көңіл бөлінуде. Ведомство жазаның бұлтартпас қағидатын дәйекті түрде қамтамасыз етіп келеді. Есепті кезеңде өткен жылдары жасалған 1685 қылмыс ашылған. Сот төрелігінен жасырынып жүрген 574 қылмыскер, оның ішінде 89-ы шетелден табылды.
Киберқылмысқа, есірткі қылмысына, ұйымдасқан қылмысқа және экстремизмге қарсы күрес нәтижелері жөнінде ақпарат берілді. Қылмыстық топтардың жолын кесу, азаматтарды қауіп-қатерлерден қорғау, сондай-ақ қауіпсіздік саласындағы халықаралық ынтымақтастықты нығайту бойынша кешенді іс-шаралар қолға алынған. Мемлекет басшысы елдегі қоғамдық қауіпсіздік пен құқықтық жүйені қамтамасыз ету үшін «Заң мен тәртіп» қағидатын нақты жүзеге асыру жөнінде бірқатар тапсырма жүктеді.
