Түркістан облысында үш полиция қызметкері 18 жастағы қызды зорлады деген ауыр айыпқа ілікті. Күдіктілердің ішкі істер органдарынан шұғыл түрде жұмыстан босатылғаны белгілі болды, деп хабарлайды Zhaiyqmedia ақпарат агенттігі.
Бұл ақпаратты Ішкі істер министрлігінің ресми өкілі Шыңғыс Әлекешев растады.
«Түркістан қаласының 18 жастағы тұрғынының арызы негізінде жыныстық қатынасқа мәжбүрлеу фактісі бойынша қылмыстық іс қозғалды. Қазір бұрынғы полиция қызметкерлерінің бұл оқиғаға қатысы толық тексеріліп жатыр. Сотқа дейінгі тергеу аясында олардың әрекетіне құқықтық баға беріледі», — деді ведомство өкілі.
Министрлік қызметтік тексеріс жүргізіп, күдікке ілінген үш қызметкерді де «қызметтік беделге нұқсан келтіргені үшін» теріс себептермен ішкі істер органдарынан босатты.
Қазіргі уақытта оқиғаның мән-жайын толық анықтау мақсатында қажетті тергеу амалдары жүріп жатыр.
