Қазақстанда биыл 26 мыңға жуық киік қырылған. Соның 11 мыңы – Батыс Қазақстан облысының үлесінде. Бұл – ел бойынша ең жоғары көрсеткіш, деп хабарлайды Zhaiyqmedia.kz ақпарат агенттігі.
Экология министрлігінің мәліметінше, киіктердің жаппай қырылуы негізінен көктемнің соңы мен жаздың басында тіркелген. Мамандар бұған ауа райының күрт өзгеруі мен мал азығының жетіспеушілігін себеп ретінде атайды.
«Қырылған киіктердің 90 пайызы – лақтар. Олар әлсіз болғандықтан, көктемгі суық пен аштыққа шыдай алмаған», – деді министрлік өкілі.
Қазіргі уақытта облыс аумағында киіктердің өлім-жітімі бақылауға алынған. Мамандар жергілікті тұрғындарға өлекселерге қол тигізбеуге кеңес береді. Өйткені олар түрлі инфекция көзі болуы мүмкін.
Айта кетейік, БҚО – киіктердің негізгі мекені. Жыл сайын мұнда мыңдаған бас киік қыстап, көктемде төлдейді. Биылғы қырылу көрсеткіші соңғы бес жылдағы ең жоғары деңгейге жетті.
