Сурет: Мәжіліс
Қазақстан Халық партиясы фракциясының депутаттары елге келетін шетелдік қаржыландыру туралы ашық ақпарат көлемін ұлғайтуды ұсынды. Мәжіліс депутаты Магеррам Магеррамов тиісті сауалды Мәдениет және ақпарат министрі Аида Балаеваға жолдады, деп хабарлайды Zhaiyqmedia.kz ақпарат агенттігі.
Бұл ұсынысқа Мемлекеттік кірістер комитетінің шетелдік көздерден қаржы алатын тұлғалардың жаңартылған тізілімін жариялауы себеп болды. Алғаш рет онда қаржы алушылармен қатар бөлінген қаражат көлемі мен оның қайдан келгені көрсетілген.
Депутаттың айтуынша, 2025 жылдың екінші жартыжылдығында Қазақстанға шетелден 12 млрд теңгеден астам қаржы түскен. «Аталған қаражаттың едәуір бөлігі өздерін құқық қорғау, медиа және сараптамалық ұйымдар ретінде таныстыратын, қоғамдық-саяси күн тәртібін қалыптастыруға қатысатын құрылымдарға бағытталған», деді Магеррамов.
Депутат қолданыстағы тізілім шетелдік қаржыландыру туралы тек жалпы мәлімет беретінін атап өтті. «Тізілімде тек қаржы көлемі мен бастапқы алушылар ғана көрсетілген. Алайда нақты қандай жобалар қаржыландырылғаны, қаржының қандай мақсатқа бөлінгені, қалай бөлінгені және түпкілікті орындаушылар туралы ақпарат жоқ. Соның салдарынан қоғам мен мемлекеттік институттар бұл қаражаттың қалай пайдаланылып жатқанын және шетелдік қаржыландыру есебінен қандай жобалар жүзеге асырылып жатқанын толық бағалай алмай отыр», делінген депутаттық сауалда.
Депутаттардың пікірінше, бұл қоғамға шетелдік гранттардың қай бағыттарға жұмсалып жатқанын және олардың қандай нәтиже беріп отырғанын жақсырақ түсінуге мүмкіндік береді. Осыған байланысты депутаттар Үкіметке шетелдік қаржыландыруды есепке алудың қолданыстағы жүйесін жетілдіру мүмкіндігін қарастырып, есептілікті кеңейтудің ықтимал тетіктері туралы ақпарат беруді ұсынды.
