Астана қаласының полицейлері жалдамалы пәтерлерде синтетикалық есірткі сақтаған 22 жастағы жігітті ұстады. Ол ірі көлемдегі есірткіні заңсыз таратпақ болған, деп хабарлайды Zhaiyqmedia.kz ақпарат агенттігі.
Күдіктінің үстінен жүргізілген тінту кезінде полиция 20 түйір синтетикалық есірткі тапты. Олардың жалпы салмағы 500 грамнан асады. Бұл – ірі көлем деп саналады.
«Күдікті есірткіні жалдамалы пәтерлерде сақтап, қала бойынша таратуды жоспарлаған. Қазір ол уақытша ұстау изоляторына жабылды», – деді Астана полиция департаментінің баспасөз қызметі.
Қазіргі уақытта тергеу амалдары жүріп жатыр. Күдіктінің есірткіні қайдан алғаны және оның басқа да сыбайластары бар-жоғы анықталып жатыр.
