Бейжіңдегі Қысқы Олимпиада ойындарында могулдың параллельді түрінен сынға түскен қазақстандық үш спортшы да жарысты аяқтады, деп хабарлайды Zhaiyqmedia ақпарат агенттігі.
Бұл сында ел намысын Юлия Галышева, Анастасия Городко және Аяулым Әмренова қорғады. Олардың ішінде ең үздік нәтижені ширек финалға дейін жеткен Анастасия Городко көрсетті.
Алғашқы іріктеу кезеңінде Аяулым Әмренова қарсыласына есе жіберіп, жарысты ерте аяқтады. Ал тәжірибелі спортшылар Юлия Галышева мен Анастасия Городко келесі айналымға қиындықсыз өтті.
Алайда екінші кезеңде Юлия Галышева қателікке бой алдырып, жарыс жолынан шығып қалды. Осылайша, ширек финалға тек Анастасия Городко жолдама алды.
Өкінішке қарай, шешуші сәтте Городко бірінші трамплиннен секіргенде тепе-теңдігін жоғалтып, құлап қалды. Бұл қателік оның жартылай финалға өтуіне мүмкіндік бермеді.
Осылайша, Қазақстанның могулшы қыздары Бейжің Олимпиадасындағы жарысын жүлдесіз аяқтады.
Фото: Тұрар Қазанғапов
