Батыс Қазақстан облысының әкімі Нариман Төреғалиев Шекара қызметі күніне орай ұйымдастырылған салтанатты жиынға қатысып, еліміздің аумақтық тұтастығын күзетіп жүрген шекарашыларды кәсіби мерекелерімен құттықтады.
— «Мемлекет басшысы Қасым-Жомарт Кемелұлы Тоқаев елдің аумақтық тұтастығы мен шекаралық қауіпсіздікке ерекше көңіл бөледі. Себебі, шекара – мемлекеттің айнасы, оның тәуелсіздігі мен қауіпсіздігінің кепілі. Біздің батыл шекарашыларымыз осы жауапты міндетті абыроймен атқарып келеді», – деді Нариман Төреғалиев.
Өңір басшысы қызмет барысында үздік нәтиже көрсеткен сарбаздар мен қызметкерлерге алғыс хаттар мен марапаттар табыс етті.
Бүгінде облыс аумағында Қазақстан Республикасы Ұлттық қауіпсіздік комитеті Шекара қызметінің бірнеше әскери бөлімдері орналасқан. Олар мемлекетіміздің батыс қақпасында қырағылықпен қызмет атқарып, ел тыныштығы мен қауіпсіздігін қамтамасыз етіп отыр.
