Павлодар облысының Ертіс ауылында қаңтарда болған өрттен зардап шеккен тағы бір сәби көз жұмды, деп хабарлайды Zhaiyqmedia ақпарат агенттігі.
Бұл туралы өңірлік денсаулық сақтау басқармасы мәлімдеді. Дәрігерлердің айтуынша, бала бүгін таңертең ауруханада қайтыс болған. Оның өліміне күйік ауруы себеп болды. Сәбидің жағдайы басынан аса ауыр болып, уақыт өткен сайын нашарлай берген – ағзасы қатты уланып, полиорганды жеткіліксіздік дамыған.
«Бала облыстық балалар ауруханасына аса ауыр жағдайда жеткізілді. Оның басы мен денесін, тыныс алу жолдарын термиялық күйік шалған, сондай-ақ иіс газына қатты уланған. Денесінің 38-40 пайызын күйік шалған еді», — деп хабарлады денсаулық сақтау басқармасы.
Еске сала кетейік, қайғылы оқиға 15 қаңтар күні таңертең Ертіс ауылындағы жеке тұрғын үйлердің бірінде болған еді. Бұған дейін екі баланың қаза тауып, тағы екеуі ауыр халде ауруханаға түскені хабарланған. Осылайша, өрттен қаза тапқан балалар саны үшеуге жетті.
Фото: Әлеуметтік желіден
