Қазақстанда мұғалімдердің орташа жалақысы өскенімен, инфляцияның кесірінен олардың нақты табысы 4,1%-ға азайған. Бұл ұстаздар қауымының сатып алу қабілеті төмендегенін білдіреді, деп хабарлайды Zhaiyqmedia ақпарат агенттігі.
Бірінші кредиттік бюроның (ББК) мәліметінше, қағаз жүзінде ұстаздардың орташа айлығы 322,7 мың теңгені құрағанымен, қымбатшылық бұл өсімді толығымен «жеп қойған». Сарапшылар мұғалімдер табысының нақты төмендеуі 2023 жылдан бері байқалып отырғанын атап өтті.
Әсіресе орта білім беру саласындағы жағдай күрделірек. Бұл саладағы мамандардың нақты табысы 6,1%-ға дейін құлдыраған.
Бұл көрсеткіш 2019-2021 жылдармен салыстырғанда үлкен айырмашылықты көрсетеді. Сол кезеңде мұғалімдердің жалақысы жыл сайын орта есеппен 17,8%-ға тұрақты өсіп отырған еді.
Қазіргі таңда білім беру саласында 1,1 миллион адам жұмыс істейді. Бұл – еліміздегі барлық жалдамалы қызметкерлердің үштен біріне жуық.
Фото: Әлеуметтік желіден
