Сурет: Egemen Qazaqstan
Астанада 43 жастағы электромеханик жоғары кернеулі токқа түсіп, қаза тапты. Марқұмның жұбайы мен жеті баласы қалған. Алдын ала мәлімет бойынша, жазатайым жағдай Астанадағы ЭЧЭ-16 тартқыш қосалқы стансасында болған, деп хабарлайды Zhaiyqmedia.kz ақпарат агенттігі.
Қызметкер байланыс желісінің фидер ұяшығында жұмыс істеп жатқан кезде жоғары кернеудің әсеріне ұшыраған.
Қайғылы жағдайды «Қазақстан темір жолы» ұлттық компаниясы растады. Компанияның хабарлауынша, оқиға 14 маусым күні болған.
«Аталған дерек бойынша белгіленген тәртіппен тергеу жүріп жатыр. Оқиғаның мән-жайы мен себептері арнайы комиссияның қорытындысынан кейін белгілі болады. Тергеу аяқталғанға дейін қандай да бір қорытынды жасауға ерте», — деп мәлімдеді ұлттық компанияның баспасөз қызметі.
ҚТЖ өкілдері тергеу жұмыстарына жан-жақты қолдау көрсетіліп жатқанын айтып, марқұмның туған-туыстары мен жақындарына көңіл айтты.
