Сурет: Egemen Qazaqstan
Қазақстан Гонконг инвесторларына құны 100 миллиард доллардан асатын жобаларды ұсынды. Бұл туралы Премьер-министрдің орынбасары – ұлттық экономика министрі Серік Жұманғарин Астанаға келген гонконгтық делегациямен кездесуде мәлімдеді, деп хабарлайды Zhaiyqmedia.kz ақпарат агенттігі.
Кездесуде тараптар экономикалық ынтымақтастықтың жаңа бағыттарын талқылады. Қазақстандық тарап инфрақұрылым, энергетика және цифрландыру салаларындағы ірі жобаларды ұсынды.
«Біз Гонконг бизнесіне Қазақстанның инвестициялық әлеуеті мен қолайлы жағдайларын көрсетуге дайынбыз. Бұл жобалар екіжақты қатынастарды жаңа деңгейге көтеруге мүмкіндік береді», – деді Серік Жұманғарин.
Гонконг делегациясы Қазақстанның ұсыныстарына қызығушылық танытып, алдағы уақытта нақты жобаларды пысықтау үшін жұмыс топтарын құруды ұсынды. Тараптар ынтымақтастықты дамыту үшін меморандумдарға қол қоюды жоспарлап отыр.
