Сурет: Ашық дереккөз
Қазақстанда тұтынушылық несиелеу нарығының қарқыны бәсеңдеп, биылғы жылдың алғашқы тоқсанында бөлшек несиелеу көлемі 4,4 пайызға қысқарған, деп хабарлайды Zhaiyqmedia.kz ақпарат агенттігі.
Тұтынушылық несиелерді беру көрсеткіші 7 пайызға төмендеген. Бұл сегмент барлық бөлшек несиелердің шамамен 85 пайызын құрайды. Қазір банктер кепілмен қамтамасыз етілген қарыздарға басымдық беруде.
Несиелер бойынша пайыздық мөлшерлемелер де өсіп, бөлшек несиелердің орташа мөлшерлемесі 20,9 пайызға жетіп, үш айда 2,7 пайыздық тармаққа артқан. Ең қымбаттаған өнімдер – автонесиелер мен кепілсіз қарыздар.
Ұлттық банк пен Қаржы нарығын реттеу және дамыту агенттігінің шаралары нәтижесінде жыл басынан бері тұтынушылық несиеге өтінімдер саны 10,7 пайызға азайған. Ипотекалық несиеге қызығушылық та төмендеп, азаматтар былтырғы кезеңмен салыстырғанда 20,7 пайызға аз жүгінген.
Сарапшылардың болжамынша, алдағы уақытта банктер қарыз беру талаптарын одан әрі қатаңдатуы мүмкін. Әсіресе ипотекалық несие алу қиындап, қарыз жүктемесінің табысқа қатынасын есептейтін жаңа коэффициент мақұлданбайтын өтінімдер санын арттыруы ықтимал. Несиеге сұраныстың төмендеу үрдісі сақталады деген болжам бар.
