Шыңғырлау ауданының Ақтау ауылдық округі 5700 бас ірі қара, 5000 бас ұсақ мал ұстап отырған елді мекен. Ардақ ауылы да 4628 бас ірі қара, 5425 бас ұсақ мүйізді мал, 1445 бас жылқы және 21 бас түйе өсіріп отырған ауыл. Тұрғындарды төрт түлігінің саулығы, мал ауруларының алдын алу, дербес малдәрігерлік пункттердің қажеттігі алаңдататын. Аудан бюджетінен бөлінген қаражатқа жеке кәсіпкер Ержан Рамазанов Ақтау және Ардақ ауылдарына жаңа ветпункт ғимараттарын салып берді.
Заманауи үлгіде салынған нысанда биопрепараттар мен дәрі-дәрмек сақтау камераларымен қамтылған арнайы бөлме, ветқызметкер бөлмесі, емшара жүргізуге қажетті жуу орыны бар. Нысандар интернетке қосылған, яғни, төрт түлік малды тіркеу, есепке алу немесе шығару, анықтамалар беру мәселелері осы жерден шешіледі. Жаңа нысандардың материалдық- техникалық қамтылуын облыстық ветеринария басқармасы қолға алған. Бұл шаралар Мемлекет басшысының ветеринария саласының жұмысын жақсарту, жетілдіру туралы тапсырмасы аясында қолға алынған.
Екі ауылдағы нысандардың ашылу салтанатына аудан әкімі Мұрат Өмірәлиев, облыстық ветеринария басқармасының басшысы Абзал Бралиев қатысты. Ашылу салтанатында сөз сөйлеген аудан әкімі тұрғындарды Елорда күні мерекесімен құттықтап, ауданымыздың даму бағыты ауылшаруашылығы саласы болғандықтан бұл нысандардың маңызы өте үлкен екенін атап өтті. Сондай-ақ, осы саланың мамандары — мал дәрігерлеріне жұмыс жағдайын жасап беру мемлекет міндеті, мүддесі екенін айтып өтті. Жаңа нысан ел қажетіне жарай берсін деген аудан басшынан кейін сөз алған облыстық ветеринария басқармасы басшысы Абзал Серікұлы шынында да тіршілігі тікелей малмен байланысты ауылдарға мұндай заманауи және жабдықталған нысанның ауадай қажеттігін, биыл аудан аумағында 5 осындай нысан салынатынын айтты. Сондай-ақғ мал қорымдарын салу жоспарланған және ветнысандарға жаңа көліктер де берілмек. Жалпы, облыс көлемінде 30 ветпункт, 30 жаңа мал қорымдары салынып, 100-жуық автокөліктер берілмекші екен.
Екі нысанның жанында өндірістік қажеттілікке есептелген, көлемі (80ш/м) шағын мал қамау орындары салынған.
Материал мен фотолар аудандық «Серпін» газетінен
