Алдағы демалыс күндері, яғни 24-26 қаңтар аралығында Қазақстан аумағында ауа райы құбылмалы болады. Атлантикадан келетін циклонның әсерінен еліміздің басым бөлігінде қар жауып, боран соғады, деп хабарлайды Zhaiyqmedia ақпарат агенттігі.
«Қазгидромет» РМК болжамына сәйкес, ел аумағында қарлы, бұрқасынды ауа райы сақталып, жел күшейеді. Ал оңтүстік өңірлерде жауын-шашын (жаңбыр, қар) болады.
Синоптиктердің мәліметінше, циклонның ықпалымен еліміздің басым бөлігіне жылы ауа массалары тарай бастайды. Осыған байланысты орталық және шығыс аймақтарда түнде ауа температурасы -5…-18°C дейін, ал оңтүстік-шығыста -2…-7°C дейін көтеріледі. Таулы аудандарда термометр бағаны -7…-15°C көрсетеді.
Дегенмен, солтүстік облыстарда аяз сақталады – түнде -20…-35°C болады. Сонымен қатар арктикалық ауаны әкелетін антициклонның әсерінен еліміздің батысында температура -15…-30°C дейін, солтүстік-батысында -20…-35°C дейін төмендейді.
Фото: pexels.com
