Орал қаласының әкімі Мұрат Байменовтің айтуынша, қала келбетін жақсарту мен тұрғындарға қолайлы орта қалыптастыру — баршаға ортақ міндет. Бұл бағытта мемлекеттік бағдарламалармен қатар, бизнестің әлеуметтік жауапкершілігі де маңызды рөл атқарып отыр.
Бүгінде демеушілердің қолдауымен Оралда бірқатар ауқымды жұмыстар атқарылуда. Атап айтқанда, Құрылысшылар, Мұнайшылар, Жұбан, Пушкин, Тоқай және Савичев тынымбақтарында жөндеу жұмыстары басталды. Мұнда жаңа жарық шамдары орнатылып, орындықтар жаңартылуда. Бұл тұрғындардың бос уақытын тиімді өткізуіне жағдай жасайды.
Сонымен қатар, демеушілер есебінен Назарбаев даңғылы бойындағы 20 тұрғын үйдің қасбеттері жаңартылып, сырланып жатыр. Бұл жұмыстар қала орталығының эстетикалық келбетін жақсартумен қатар, тарихи ғимараттардың сәулеттік ерекшелігін сақтауға бағытталған.
Әкімнің айтуынша, мұндай жобалар бизнестің қаланың дамуына бейжай қарамай, өз үлесін қосып отырғанының көрінісі.
«Бірлесе әрекет еткенде ғана Оралды одан әрі жайлы, әсем, заманауи қалаға айналдыра аламыз», — деді Мұрат Байменов.
Бердалы Ораз / Жайық тілшісі
