Президент Қасым-Жомарт Тоқаев 2025 жылғы елдің ең маңызды ғылыми жетістігін атады. Бұл туралы ол Астанада өткен ғалымдарды марапаттау рәсімінде мәлімдеді.
Мемлекет басшысының айтуынша, негізгі жетістік – ALEM (Astana Life Ex-situ Machine) инновациялық медициналық аппаратын жасау болды.
«Ең алдымен, бүгінде университеттердің технологиялық хабтарға айналып келе жатқанын атап өткен жөн. Мысалы, өткен жылы University Medical Center Жүрек орталығының дәрігерлері бірегей жаңалық – ALEM (Astana Life Ex-situ Machine) инновациялық медициналық аппаратын әзірледі. Бұл құрылғыны 2025 жылдың ең маңызды ғылыми жетістігі деп толық айтуға болады. Аталған құрылғы донорлық органның адам денесінен тыс жерде 24 сағаттан астам уақыт бойы функционалдылығын сақтауға мүмкіндік береді. Осындай бірегей жетістіктер қазақстандық ғылымның жоғары әлеуетін көрсетеді», – деді Қасым-Жомарт Тоқаев.
Донорлық ағзаларды сақтауға арналған технология
ALEM (Astana Life Ex-situ Machine) құрылғысы донорлық ағзаларды сақтау және тасымалдау үшін арналған. Жүйе олардың өміршеңдігін 24 сағаттан астам уақыт бойы сақтауға мүмкіндік береді.
Дәстүрлі әдіспен салыстырғанда, онда ағза тек 4-6 сағат қана сақталса, ALEM табиғи жағдайға жақын орта қалыптастырады. Құрылғы температураны бақылап, қанды оттегімен қанықтырады және негізгі көрсеткіштерді нақты уақыт режимінде қадағалайды.
