Сурет: Kazinform
2026 жылдың бірінші тоқсанында Қазақстанда берілген жаңа ипотекалық қарыздардың көлемі 438 миллиард теңгеге жетіп, өткен жылмен салыстырғанда 12,3%-ға өскен, деп хабарлайды Zhaiyqmedia.kz ақпарат агенттігі.
Қазақстан қаржыгерлер қауымдастығының мәліметінше, нарықтың өсуіне негізінен жеңілдетілген ипотека көлемінің ұлғаюы әсер еткен. Сарапшылардың айтуынша, жаңа несиелердің жалпы өсімін толықтай «Отбасы банк» қамтамасыз еткен. Банк несие беру көлемін өткен жылмен салыстырғанда 54,3%-ға арттырып, 347,5 миллиард теңгеге жеткізген. Мемлекеттік бағдарламалардың кеңеюі нарықтық ипотекаға теріс әсер еткен факторлардың зардабын жоюға мүмкіндік берген. Қазіргі таңда банктердің қымбат қорлары, жоғары базалық мөлшерлеме мен реттеушілік шектеулер салдарынан нарықтық шарттармен берілетін ипотека көлемі 53,6%-ға қысқарған.
Осы үрдіс аясында мемлекеттік бағдарламалардың маңызы артқан. Бір жыл бұрын жаңа несиелердің 73,9%-ы жеңілдетілген ипотекаға тиесілі болса, қазір бұл көрсеткіш 85,1%-ға жеткен. Екінші деңгейлі банктердің ипотека нарығындағы үлесі 14,9%-ға дейін қысқарған.
Елде ипотекаға сұраныс бәсеңдеп келеді. Банктерге түскен өтінімдер саны 20,7%-ға азайып, 192 мың болған — бұл соңғы екі жылдағы ең төменгі көрсеткіш. Сарапшылардың пікірінше, бұған тұрғын үй бағасының өсуі, халықтың нақты табысының қысқаруы және зейнетақы жинақтарын пайдаланудың қиындауы әсер еткен.
Нарық құрылымы да өзгеріп келеді. Сомасы 20 миллион теңгеден асатын қарыздардың үлесі 30%-дан 37%-ға өссе, 10 миллион теңгеге дейінгі шағын несиелердің үлесі 22%-дан 17%-ға дейін азайған. 2027 жылға дейін ипотекалық қарыздар бойынша жылдық тиімді сыйақы мөлшерлемесінің шекті мөлшері өзгеріссіз қалады.
