Алматы қаласында кісі өлтіру фактісі бойынша ер адам ұсталды.
Желідегі ақпаратқа сәйкес, күдікті мен оның қайын атасы арасында туындаған жанжал барысында күдікті туысына бірнеше рет пышақ сұққан.
Алматы қаласы Полиция департаменті Медеу аудандық полиция басқармасы аталған оқиғаға қатысты қылмыстық іс қозғағанын мәлімдеді.
— Күдікті қылмыс орнынан қашып кетпек болғанымен, «ізін суытпай» ұсталды және уақытша ұстау изоляторына қамалды. Қазіргі таңда сотқа дейінгі тергеу амалдары жүргізілуде. Тергеу барысында қылмыстың тұрмыстық себептерге байланысты, екі ер адам арасындағы ауызша жанжал кезінде орын алғаны анықталды, — деп хабарлады Полиция департаментінің баспасөз қызметі.
Еске сала кетейік, бұған дейін Алматыда автобус ішінде егде жастағы азаматты ұрған күдікті ұсталған болатын.
