АҚШ вице-президенті Джей Ди Вэнс Гренландияға қатысты ұстанымы үшін Еуропа мен Данияны қатты сынады. Ол бұл аймақты АҚШ пен әлем қауіпсіздігі үшін стратегиялық маңызы зор деп атады, деп хабарлайды Zhaiyqmedia ақпарат агенттігі.
Вэнстің айтуынша, Гренландия алыс қашықтықтан атылған зымыран шабуылдарын бақылау мен болдырмауда негізгі рөл атқарады. Алайда, Еуропа елдері мен Дания бұл міндетті лайықты түрде атқара алмай отыр.
«Еуропа АҚШ президентінің және бүкіл әкімшіліктің Гренландияның жаһандық қауіпсіздік үшін шешуші рөл атқаратыны жайлы уәжіне мән бермеді», — деді ол Fox News арнасына берген сұхбатында.
Сондай-ақ ол зымыраннан қорғаныс жүйесінің маңызды бөлігі осы аралға тәуелді екенін атап өтті.
«Адамдар зымыранға қарсы қорғаныс инфрақұрылымының бір бөлігі тікелей Гренландияға байланғанын түсінбей отыр», — деді Вэнс.
Айта кетейік, бұған дейін Еуропа елдерінің басшылары бірлескен мәлімдеме жасап, Гренландияны иемденуге қатысты АҚШ президенті Дональд Трамптың жоспарына қарсы тұрған Данияны қолдады.
