Ішкі істер вице-министрі Игорь Лепеха марқұм Нұрай Серікбайдың жауап беріп отырған видеожазбасының таралуына қатысты пікір білдірді, деп хабарлайды Zhaiyqmedia ақпарат агенттігі.
Бұған дейін жәбірленуші тараптың адвокаты Сержан Нұрпейісов бұрынғы полиция қызметкерінің үстінен іске қатысты құпия дәлелдемелерді таратқаны үшін шағым түсірген болатын. Әңгіме марқұм қыздың күдіктіге ешқандай шағымы жоқ екенін айтқан видеожазбасы туралы болып отыр.
Игорь Лепеханың айтуынша, полиция департаменті қызметкерінің жазбаны таратуға еш құқығы болмаған.
«Оның бұлай жасауға құқығы болмады. Бірақ тағы да қайталап айтамын: іс қозғалды, осы әрекетке де құқықтық баға беріледі», – деді ол Сенатта өткен брифингте.
Вице-министр полиция қызметкерлерінің салғырттығына қатысты қылмыстық істің тергеу барысы туралы пікір білдіруден бас тартты. Ол тергеудің ресми аяқталуын күтуді сұрады.
Фото: Әлеуметтік желіден
