Президент армияны жаңғырту және қорғаныс қабілетін арттыру шараларын қолға алды. Енді үздік әскери оқу орнын бітіргендерге бірден «аға лейтенант» шенін беру мүмкіндігі қарастырылуда.
Бұл туралы Мемлекет басшысы Қарулы Күштердің әскери оқу орындары түлектерінің салтанатты жиынында мәлімдеді, деп хабарлайды Zhaiyqmedia.kz ақпарат агенттігі.
Президенттің айтуынша, бұл шара әскери білім сапасын арттырып, жастардың әскерге деген қызығушылығын күшейтеді. Сонымен қатар, әскери кафедралар мен оқу орындарының базасын жаңарту жұмыстары жалғасуда.
«Біз әскери білім беру жүйесін түбегейлі өзгертуіміз керек. Үздік түлектерге бірден жоғары шен беру – осы бағыттағы алғашқы қадам», – деді Президент.
Бұл бастама әскери саладағы кадрлық резервті нығайтуға және жастарды әскери қызметке ынталандыруға бағытталған. Жаңа жүйе бойынша, үздік диплом алған түлектер лейтенант шенін аттап, тікелей аға лейтенант атанады.
