Үндістанның Тамилнад штатында отшашу шығаратын зауытта қуатты жарылыс болып, кемінде 23 адам қаза тапты, ал кәсіпорын иесі оқиға орнынан бой тасалаған, деп хабарлайды Zhaiyqmedia ақпарат агенттігі.
Hindustan Times басылымының мәліметінше, оқыс оқиға Вирудхунагар ауданындағы Vanaja Fireworks кәсіпорнында тіркелген. Жарылыс кезінде зауытта 30-ға жуық жұмысшы болған. Қаза тапқандар саны – 23, тағы алты адам ауруханаға жеткізілді.
Өрт сөндіру және құтқару қызметінің хабарлауынша, жарылыс жергілікті уақытпен сағат 15:30 шамасында жұмысшылар шикізатты өңдеп, пиротехникалық өнімдер дайындайтын аймақта болған. Соққының қатты болғаны сонша, үш ғимарат толығымен қирап, жақын маңдағы құрылыстар жермен-жексен болған.
Құтқару жұмыстары кезінде тағы бір жарылыс болып, бір өрт сөндіруші ауыр жарақат алған.
«23 адамның қаза тапқаны расталды. Зардап шеккен алты адам аудандық ауруханада емделіп жатыр», — деді жергілікті шенеунік оқиға орнын тексергеннен кейін.
Алдын ала мәлімет бойынша, зауыттың лицензиясы болған және өндіріс алаңында 100-ден астам адам еңбек ете алатын. Кәсіпорын қожайыны жарылыстан кейін жасырынып қалған, қазір оған іздеу жарияланды. Полиция қылмыстық іс қозғады, енді зауыт лицензиясынан айырылады.
Бұл қайғылы оқиға осы ауданда төрт адамның өмірін қиған басқа жарылыстан бірнеше күн өткен соң қайталанып отыр.
Фото: Әлеуметтік желіден
