Батыс Қазақстан облысының Ақжайық ауданында тағы бір ұшқышсыз ұшу аппаратының сынықтары табылды, бұл соңғы айларда өңірде тіркелген осындай бесінші жағдай, деп хабарлайды Zhaiyqmedia ақпарат агенттігі.
Облыстық полиция департаменті бұл ақпаратты растады. Ведомствоның мәліметінше, белгісіз нысан елді мекендерден тыс жерге құлаған. Қазіргі уақытта оқиғаның мән-жайын анықтау үшін тиісті тексеру жұмыстары басталды.
Бұл – Батыс Қазақстан аумағында ұшқышсыз аппараттың құлауына қатысты алғашқы оқиға емес. Бұған дейін мұндай жағдайлар Бөкейордасы, Тасқала және Жәнібек аудандарында да тіркелген болатын.
Бұрынғы оқиғаларға байланысты Қорғаныс министрлігі түсініктеме берген еді. Министрлік өкілдері табылған сынықтардың облыс аумағымен шектесетін ресейлік сынақ полигонының қызметіне қатысты болуы мүмкін екенін жоққа шығармайды.
Фото: Әлеуметтік желіден
