Америка Құрама Штаттарының мұнай блокадасы салдарынан Кубада алғаш рет бүкіл ел аумағында электр қуаты толығымен сөнді, деп хабарлайды Zhaiyqmedia ақпарат агенттігі.
Куба президенті Мигель Диас-Канельдің айтуынша, елге үш айдан бері отын импортталмаған. Вашингтонның қысымынан кейін Венесуэла мен Мексика Кубаға мұнай жеткізуді тоқтатқан.
«Біз соңғы үш айда мүлдем отын импорттамадық. Бұл АҚШ-тың біздің негізгі серіктестерімізге жасаған қысымының тікелей салдары», — деп мәлімдеді мемлекет басшысы.
Бұл дағдарыс елдегі жанармай бағасының күрт өсуіне және дәрі-дәрмек тапшылығына алып келді. Қазіргі уақытта энергетиктер электр желісін қалпына келтіруге тырысып жатыр. Алайда сарапшылар ескірген инфрақұрылым жағдайды одан сайын қиындатып отырғанын айтады.
Фото: Әлеуметтік желіден
