Украина президенті Владимир Зеленский соғыстың алғашқы кезеңінде Ресей әскері қолданған «Шахед» дрондарын ирандық нұсқаушылар басқарғанын мәлімдеді, деп хабарлайды Zhaiyqmedia ақпарат агенттігі.
Оның айтуынша, Ресейде мұндай қаруды басқаратын мамандар болмаған, сол себепті Ираннан келген операторлар ресейлік әскерилерді тікелей ұрыс алаңында оқытып, үйреткен.
Бұл туралы Зеленский Бухарестте өткен баспасөз мәслихатында айтты. Украина аумағына «Шахед» дрондарымен алғашқы шабуылдар 2022 жылдың күзінде басталған болатын.
«Қазір бізде Patriot жүйесіне арналған PAC-3 зымырандары жетіспейді. Киев бұл зымырандарды алу үшін өзінде бар дронға қарсы құрылғыларды айырбастауға дайын», – деді Украина басшысы.
Осы аптада Украинаның қауіпсіздік саласының мамандары дронға қарсы күрес мәселесін талқылау үшін Катар, Біріккен Араб Әмірліктері және Сауд Арабиясына сапармен барады.
Фото: Әлеуметтік желіден
