12-14 наурыз аралығында Қазақстанның барлық облысында ауа райы біртіндеп жылынады, деп хабарлайды Zhaiyqmedia ақпарат агенттігі.
«Қазгидромет» РМК мамандарының мәліметінше, соңғы күндері еліміздің солтүстік және шығыс аймақтары аяз әкелген суық антициклонның ықпалында болды. Алайда 12 наурыздан бастап республиканың бүкіл аумағында ауа температурасы біртіндеп көтеріле бастайды.
Болжамға сәйкес, елдің солтүстігінде ауа температурасы нөлден сәл жоғары болады. Ал оңтүстік өңірлерде 14 наурызға қарай күн +5…+10 градусқа дейін жылынады.
Синоптиктер бұған дейін наурыз айында ауа райы құбылмалы болатынын ескерткен еді. Жауын-шашын, кей жерлерде қатты жауын-шашын күтіледі: еліміздің солтүстік бөлігінде негізінен қар, ал батыс пен оңтүстікте жаңбыр мен жылбысқы қар жаууы мүмкін. Сондай-ақ қатты жел, бұрқасын, тұман және көктайғақ болуы ықтимал.
Фото: Әлеуметтік желіден
