Белгілі америкалық журналист Такер Карлсон Израильдің «Моссад» барлау қызметі Катар мен Сауд Арабиясында лаңкестік әрекеттер ұйымдастыруды жоспарлағанын мәлімдеді, деп хабарлайды Zhaiyqmedia ақпарат агенттігі.
Оның айтуынша, жақында Катар мен Сауд Арабиясының билігі өз аумағында жарылыс жасамақ болған израильдік агенттерді ұстаған.
«Иранның өзінен шабуыл көріп отырған Парсы шығанағындағы екі елде израильдіктерге жарылыс жасаудың не қажеті бар? Олар бір жақта емес пе? Жоқ. Жоқ. Жоқ», – деді Карлсон Израильдің ниетіне күмән келтіріп.
Журналист Израиль тек Иранды ғана емес, сонымен қатар Парсы шығанағындағы одақтас саналатын Катар, БАӘ, Сауд Арабиясы, Бахрейн, Оман және Кувейтті де әлсірету арқылы өз мүддесін көздеп отыр деп санайды.
Сонымен қатар Такер Карлсон қаза тапқан америкалық әскерилер туралы ресми деректерге де күмәнмен қарайтынын жеткізді. Ол соғыс аймағында хабарланғаннан әлдеқайда көп америкалық сарбаздың мерт болғанын алға тартты.
Карлсон бұл соғыс АҚШ-тың ұлттық қауіпсіздігі үшін емес, тек Израильдің қалауымен жүріп жатқанын атап өтті.
Фото: Әлеуметтік желіден
