Ішкі істер министрлігі қауіпсіздігі ең төмен мекемелердегі сотталғандарға мекемеден тыс жерде смартфон пайдалануға рұқсат беруді ұсынды, деп хабарлайды Zhaiyqmedia ақпарат агенттігі.
Бұл өзгеріс тек қоныс-колонияларына қатысты. Тиісті бұйрық жобасы «Ашық НҚА» порталында 11 наурызға дейін қоғамдық талқылау үшін жарияланды.
Жаңа ережеге сәйкес, сотталғандарға мекеме аумағынан тыс жерде смартфон қолдануға мүмкіндік берілуі мүмкін. Сонымен қатар тәртібі оң бағаланғандар үшін «тыныштық сағаты» енгізіліп, жемқорлықты болдырмау үшін кездесулер мен қалаға шығуға өтініштерді арнайы терминалдар арқылы қабылдау ұсынылды.
Қоныс-колониялары – қауіпсіздігі ең төмен мекемелер. Мұнда абайсызда немесе ауырлығы онша емес қылмыс жасағандар жазасын өтейді. Ондағыларға азаматтық киім киюге, отбасымен тұруға және мекемеден тыс жұмыс істеуге рұқсат етілген.
Фото: Әлеуметтік желіден
