Түркістан облысында көкпар ойыны жаппай төбелеспен аяқталып, 20 жастағы жігіт өлім аузынан қалды. Оны аяусыз соққыға жыққан күдіктілердің қамаудан босатылғаны белгілі болды, деп хабарлайды Zhaiyqmedia ақпарат агенттігі.
Оқиға салдарынан ауыр жарақат алған – 20 жастағы Ақбаржан Әбдімәжитов. Жәбірленушінің жақындарының айтуынша, топтасқан 25-ке жуық адам бес жігітке тап берген. Олар есінен танып құлаған Ақбаржанның басынан секіріп, кейін көлікке тиеп, елсіз далаға апарып тастаған.
Ауыр халде табылған жігіт бір апта бойы жансақтау бөлімінде жатып, жақында ғана палатаға ауыстырылды. Алайда ол әлі күнге дейін есін толық жия қоймаған.
«Баламыздан айырылып қала жаздадық. Енді аурухананы күзетуге мәжбүрміз, себебі 25 адамның біреуі де қамалған жоқ. Олардың бостандықта жүруі баламыздың өміріне тағы да қауіп төндіреді», – дейді жәбірленушінің ата-анасы.
Ал Түркістан облыстық полиция департаменті жаппай төбелеске қатысты екі күдіктінің анықталып, қамауға алынғанын мәлімдеді. Алайда көп ұзамай ведомство өкілдері олардың үйқамаққа жіберілгенін растады.
Фото: Әлеуметтік желіден
