Қазақстанда тұрғын үй нарығындағы сатылым көлемі бір айда 47,8 пайызға дейін күрт төмендеп кетті. Бұл 2024 жылдың қаңтарындағы көрсеткіш, ал 2023 жылдың желтоқсанымен салыстырғанда елде жасалған мәмілелер саны екі есеге жуық азайған, деп хабарлайды Zhaiyqmedia ақпарат агенттігі.
Ұлттық статистика бюросының мәліметінше, қаңтар айында елімізде 27 745 тұрғын үй сатылған. Оның ішінде 21 725-і – көпқабатты үйлердегі пәтерлер, ал қалған 6 020-ы – жер үй.
Бұл көрсеткіш 2023 жылдың желтоқсанымен (53 128 мәміле) салыстырғанда 47,8 пайызға аз. Дәстүрлі түрде мәмілелер саны бойынша Астана (5 375) мен Алматы (5 191) қалалары көш бастап тұр. Үздік үштікті Қарағанды облысы (2 241) түйіндеді.
Ал ең төменгі көрсеткіш жаңадан құрылған Ұлытау облысында тіркелді – небәрі 283 сату-сатып алу келісімшарты.
Сарапшылардың айтуынша, сатылымның айлық төмендеуі еліміздің барлық өңірінде байқалған. Әсіресе Павлодар (-68,1%), Абай (-64,0%) және Солтүстік Қазақстан (-57,3%) облыстарында құлдырау қатты болды.
Сонымен қатар былтырғы жылдың қаңтарымен салыстырғанда да сатылым 10,3 пайызға азайғаны анықталды.
Фото: Әлеуметтік желіден
