Қазақстандық боксшы Жәнібек Әлімханұлының допинг дауына қатысты белгілі спорт журналисі пікір білдіріп, оның болашағына қатысты жағымсыз болжам жасады, деп хабарлайды Zhaiyqmedia ақпарат агенттігі.
Еске салсақ, 2025 жылдың желтоқсан айында Әлімханұлының қанынан тыйым салынған мельдоний препараты табылған еді. Осыған байланысты оның Эрисланди Лараға қарсы біріктіруші жекпе-жегі өтпей қалды. Қаңтар айында ашылған B сынамасы да бірінші нәтижені растады.
Украиналық танымал журналист, vRINGe.com сайты бас редакторының орынбасары Святослав Осипов бұл жағдайға қатысты өз ойымен бөлісті. Оның айтуынша, кәсіпқой бокс – спорттан гөрі бизнеске жақынырақ.
«Ешқандай жұмсартпай, ашығын айтайын. Өздеріңіз білетіндей, кәсіпқой бокс – бұл бизнес, оның ішінде аздап қана спорт бар. Мұнда допинг оқиғалары жиі кездеседі және көбіне жабық есік жағдайында шешіледі. Бірақ бұл тек бір жағдайда ғана жұмыс істейді: егер кінәлі боксшы – «құнды актив» болса. Яғни, ол бокс нарығына қомақты пайда әкелсе ғана…»
Сарапшының пікірінше, Жәнібек Әлімханұлы мұндай «құнды активке» жатпайды, сондықтан оның промоутерлері бұл мәселені оңай шешуге тырыспайды.
«Жәнібек сондай боксшы ма? Ол үшін біреу күресе ме? Өкінішке қарай, жоқ. Оның үстіне, оның Top Rank промоутерлік компаниясымен қарым-қатынасы да ерекше. Тіпті промоутердің өзі боксшыны Хамза Ширазбен жекпе-жектен бас тартты деп айыптаған оқиғаны еске алайық. Шындық болса да, бұлай жасамайды».
Осиповтың болжамынша, Әлімханұлын уақытша шеттету және чемпиондық белбеулерінен айыру жазасы күтіп тұр. Ол үшін ең жақсы сценарий – 6-9 айға шеттетіліп, жаза мерзімі аяқталған соң титулдық жарысқа іріктеу жекпе-жегі арқылы қайта қосылу мүмкіндігі.
Сондай-ақ журналист қазіргі ең маңызды мәселе – Top Rank компаниясымен келісімшарттың тағдыры екенін атап өтті. Ол Жәнібекке ағылшын тілін үйренуге баса назар аударуға кеңес берді. Себебі бұл АҚШ нарығында, әсіресе Дэйни Уайттың Zuffa Boxing сияқты ұйымдары үшін өте маңызды.
Фото: Әлеуметтік желіден
