Қазақстан мұсылмандары діни басқармасы (ҚМДБ) жасанды интеллект арқылы жасалатын дипфейк технологиясын әзірлеуге және қолдануға қатысты арнайы пәтуа шығарды, деп хабарлайды Zhaiyqmedia ақпарат агенттігі.
Дипфейк – бұл жасанды интеллект көмегімен жасалған, шындықтан аумайтын фото, аудио және видеоматериалдар. Діни басқарма ислам дінінің ғылым мен техниканың дамуына ешқашан қарсы болмағанын, бірақ кез келген жаңалық адамзатқа пайдалы, әділ және моральдық тұрғыдан дұрыс болуы тиіс екенін атап өтті.
ҚМДБ мәліметінше, жаман ниеті жоқ және шариғатқа қайшы келмейтін барлық технологияны қолдануға рұқсат етіледі. Алайда, дипфейктің зиянды мақсатта қолданылуына алаңдаушылық білдірді.
«Жалған жаңалық тарату үшін қолданылатын дипфейкке шариғатта қатаң тыйым салынады. Мұндай фейк жаңалықтар елдің тыныштығын бұзып, қоғамда іріткі тудыруы мүмкін. Егер мұның алды алынбаса, салдары ел бірлігіне нұқсан келтіріп, қоғамға зиян тигізеді», – делінген ҚМДБ сайтында жарияланған пәтуада.
Фото: Әлеуметтік желіден
