Ақтөбе облысында алыс аудандардағы жүкті әйелдерге арналған «Салауатты ана» пансионаты ашылды,-деп хабарлайды Жайықмедиа.кз.

Қазақстан Республикасы Денсаулық сақтау министрлігі мен Ақтөбе облысы әкімдігінің бастамасымен облыстық перинаталдық орталық базасында жүкті әйелдерге арналған жаңа әлеуметтік-медициналық нысан – «Салауатты ана» пансионаты өз жұмысын бастады.

Нысанның басты мақсаты – ана мен баланың денсаулығын қорғау, жүкті әйелдерде болатын асқынулардың алдын алу және өңірдің шалғай ауылдарында тұратын аналарды уақтылы, сапалы медициналық бақылаумен қамтамасыз ету.

Пансионатта 10 төсек-орын қарастырылған. Мұнда жүктілік кезінде асқыну қаупі жоғары әйелдер босану уақытына дейін тегін негізде тәулік бойы дәрігерлердің бақылауында болады. Күнделікті кешенді тексерулер жүргізіледі, ал қандай да бір ауытқу, асқыну белгілері анықталған жағдайда немесе босану процесі басталса, білікті көмек жедел көрсетіледі.

Жоба мынадай артықшылық береді:

шалғай аудандардағы жүкті әйелдер үшін уақтылы медициналық көмектің қолжетімділігін арттыру;
асқынуларды ерте диагностикалау арқылы ана мен бала өміріне төнетін қауіпті азайту;
қажетті медициналық шешімдерді дер кезінде қабылдау;
перинаталдық өлім-жітімді төмендетуге үлес қосу.

Денсаулық сақтау министрлігінің мәліметінше, мұндай пансионаттар басқа облыстарда да кезең-кезеңімен іске қосылады.