Сурет: Ашық дереккөз
Алакөл Қазақстандағы ең танымал туристік бағыттардың біріне айналды. Жыл сайын көл жағалауына келушілер саны артып, өңірдің туристік әлеуеті күшейіп келеді. 2026 жылы өңірге рекордтық 2 миллион турист келеді деп күтіледі, деп хабарлайды Zhaiyqmedia.kz ақпарат агенттігі.
Алакөлдің басты ерекшелігі – минералдарға бай суы мен ерекше табиғаты. Мамандардың айтуынша, көл суы мен жағалаудағы климат ағзаны қалпына келтіруге қолайлы. Сондықтан мұнда тек демалып қана қоймай, денсаулығын нығайту үшін келетіндер де аз емес. Туризмнің дамуы өңір экономикасына оң әсер етіп, жаңа жұмыс орындары ашылып, шағын және орта бизнес қарқынды дамып келеді. Жергілікті кәсіпкерлер туристерге арналған қызмет түрлерін кеңейтіп, ұлттық тағамдар, экскурсиялар, судағы ойын-сауық пен белсенді демалыс бағыттарын ұсынуда.
Соңғы жылдары Алакөлге жету де жеңілдеді. Туристік маусымда теміржол бағыттарының саны көбейіп, әуе рейстері ұйымдастырылып, автожолдар жаңғыртылуда. Бұл еліміздің түкпір-түкпірінен келетін демалушылар үшін қолайлы жағдай қалыптастырды.
Алакөлдің дамуы цифрлық технологиялармен де байланысты. Өңірді дамытудың мастер-жоспары бойынша заманауи туристік-рекреациялық аймақ құру көзделген. Жоба тәулігіне 75 мың турист қабылдай алатын инфрақұрылым қалыптастыруды қамтиды. Оның ішінде жағалауды нығайту, көшелерді абаттандыру, көлік жүйесін жетілдіру, цифрлық сервистерді енгізу және тұрақты интернетпен қамтамасыз ету қарастырылған.
