Сурет: Aikyn.kz
Қазақстанның алты өңірінде өрт қаупі жоғары деңгейде сақталып тұр. Синоптиктердің болжамынша, аптап ыстық пен құрғақшылық өрттің таралу қаупін арттырып отыр, деп хабарлайды Zhaiyqmedia.kz ақпарат агенттігі.
Қазгидромет мамандарының мәліметінше, ең жоғары – бесінші дәрежелі өрт қаупі Атырау, Маңғыстау, Қызылорда, Түркістан облыстарында, сондай-ақ Жамбыл облысының кейбір аудандарында тіркелген. Бұл аймақтарда ауа температурасы +40 градусқа дейін көтеріліп, жауын-шашын күтілмейді.
«Төртінші дәрежелі өрт қаупі Батыс Қазақстан, Ақтөбе, Қостанай, Ұлытау, Қарағанды, Абай, Шығыс Қазақстан, Жетісу және Алматы облыстарында сақталады. Бұл өңірлерде де ыстық ауа райы мен құрғақшылық өрт шығу қаупін туғызады», – деп хабарлады Қазгидромет.
Төтенше жағдайлар министрлігі өрт қаупі жоғары аймақтарда арнайы режим енгізіп, өрт сөндіру бөлімшелерін күшейтілген кезекшілікке көшірді. Азаматтарға орманды алқаптарда от жақпауға, темекі қалдықтарын тастамауға кеңес беріледі.
